Un pequeno máis listo cun allo sabía o catecismo do dereito e do réves. Tan ben, que el mesmo lle dicía ao señor crego que non tiña por que collelo. Un día, o señor crego empezoulle a preguntar polo máis difícil. Pero o rapaz non fallaba unha. Seguíulle preguntando e, por fin, dunha vez o pequeno non soubo responder. Entón o crego empezoulle a dicir:
- Logo caíches, rapaz. E logo caíches.
Quedouse o rapaz todo avergoñado pola burla e quedouse pensando como cobrarlla ao crego. Por fin ocorreuselle preguntarlle:
- Señor crego, ¿ e Deus estará no forno do meu pai ?
- ¡ Home ! ¿ E logo ? ¿ Ti non sabes que Deus está en todas partes ?
- Agora si que tamén o collín eu a vostede, señor crego, que meu pai non ten forno.
Ningún comentario:
Publicar un comentario